KAMIS, 18 MEI 2023 PESTA PARNINGOATAN ARI HANANAEK NI TUHAN JESUS

 PARTORDING NI PARPUNGUAN

PESTA PARNINGOATAN ARI HANANAEK NI TUHAN JESUS

 & Ev: Johannes 6: 60-63                & Ep: Heber 12: 1-6   

 TOPIK JAMITA:

 “MANGHAPORSEAI JESUS NA MANAEK TU SURGO”

 HKBP CIBITUNG

RESORT SOLA GRACIA CIBITUNG

 

KAMIS, 18 MEI 2023

 

JOUJOU MAMUJI TUHAN I

 

P:   Ari las ni roha do sadari on di huria i di sandok portibi on, i ma Pesta Parningotan Ari Hananaek ni Tuhan Jesus Kristus tu banua ginjang. Nunga sun ulaonNa, i ma pasauthon ulaon na sinuru ni AmaNa tu Ibana. Nunga dipasahat tu Ibana nasa huaso di banua ginjang dohot na di tano on. Nunga manaek Ibana tu siamun ni Debata AmaNa i, paradehon inganan tu angka na porsea di Ibana. Antong tapatimbul ma Ibana, Tuhan na marsangap i. Ita pangiar ma suaranta, marende ma hita!

 

1.       Marende BE HKBP No. 638: 1-3 Patimbul Tuhan i (BL 638) D=Do 4/4

 

 ^♫ Patimbul Tuhan i, di habangsaNa i.

Marhasak baen soaram i, mamuji Tuhan i.

Endehon ma Rajam, sian sandok roham;

Naung mate ala ni dosam, oloi ma Debatam.

 

^♫   Patimbul Anak i, naung gabe jolma i.

Na mangantusi arsakmi, na pangoluhon i.

Dijangkon hita be, gabe jambarNa i.

Asa sonang hita muse, di adopanNa i.

 

… Musik …

 

^♫   Patimbul Tuhan i, Raja Parngolu i.

Naung hehe do Tuhanta i, sian na mate i.

Marende hita be, mamuji sangap ni i.

dilehon do tu hita be, ngolu na tongtong i.

 

2.    Votum–Tangiang

U:   Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Parbadia na tumompa langit dohot tano on. Amen. Songon on do didok Tuhan i: BahenonHu do sogot na monang i rap dohot Ahu hundul di habangsangKi, songon Ahu na monang i jala hundul rap dohot Damang di habangsaNa i. Haleluya!

 

H:   (Mangendehon) BE HKBP No. 852: 1 HALELUYA HKBP (3x) (BL 852) G=Do 4/4

       Haleluya, haleluya, haleluya.

U:   (Martangiang ma hita:) Ale Tuhan Debata, Pargogo na so hatudosan! Sai pargogoi ma hami manghaporseai AnakMu na sasada i, Sipangolu hami, na manaek tu surgo, asa huparrohahon hami roha banua ginjang marhitehite Anak haholongan ni rohaM, Tuhan Jesus Kristus, Tuhannami. Amen.           (Hundul)

3. Marende BE HKBP No. 99: 3 O Tondi Parbadia i, Bongoti (BL 206) Es=Do 4/4

 

^♫ O Jesus, Ho do ulu ni luhutna na porsea i, ruasMu anggo hami.

Ho hangoluannami on, Ho hasonangannami on, Ho hagogoonnami.

Suru, togu, rohanami asa hami mangalehon, tu Ho nasa hasangapon.

 

4. Patik NI DEBATA

 

U: Tatangihon ma Patik ni Debata di Pesta Parningotan Ari Hananaek ni Tuhan Jesus sadari on sian Buku Panurirang Hosea 6: 3. Sai mananda ma hita, sai ringgas ma hita mangeahi parbinotoan di Jahowa, tudoshon buhasiang ari do sintong ni habibinsarNa, jala sai na ro do Ibana songon udan tu hita songon udan nene na mamornohi tano i. I ma hatana! Antong, rap mangido gogo ma hita sian Tuhan Debata!

 

 U+H: Ale Tuhan Debata sai pargogoi ma hami mangulahon na hombar tu PatikMi. Amen.

5.  Marende BE HKBP No. 182: 2 + 3 Tu JoloM o Debatangku (BL 24) Bes=Do 3/4

 

^♫   Husolsoli do rohangku na gok dosa i tongtong;

     Ai godang ariaringku, na hubahen ambolong.

 

                            … Jongjong …

 

^♫   Sai jotjot do hutadingkon, dalanMi na tigor i;

     Kristen au, hape hutondong, dalan hamagoan i.

 

6. Manopoti Dosa    

U:   Tatopoti ma dosanta! Ale Tuhan Debata, Ama ni Tuhannami Jesus Kristus, Ho do Debata pargogo na so hatudosan, sitompa nasa na adong, paruhum na tigor, na manguhumi jolma manisia! Na ro do hami tu joloM manopoti dosanami, angka na huula hami marhite sian pangalaosionnami di PatikMu, i ma marhite sian tubutubu ni rohanami. Na tama situtu do hona uhum hami ala ni dosanami i, alai na tarsolsol bagi do hami nuaeng ala ni i. Asi ma rohaM di hami, ale Debatanami. Pardengganbasa jala Parasiroha do Ho ala ni Anak haholongan ni rohaM, Tuhan Jesus Kristus Tuhannami. Sai sesa ma dosanami saluhutna, jala suru ma Tondi Parbadia tu rohanami be, asa tarbahen hami mangoloi Ho di bagasan hatigoran dohot habadiaon, gabe sahat hami tu hangoluan na so ra suda, na pinarbagabagaM di angka na porsea di AnakMu, Tuhan Jesus Kristus, Tuhannami.

 

H:   Amen.

 

Musik: (Mangendehon BE HKBP No. 165: 2 O Jesus na Pangolu Au (BL.19) D=Do 4/4

 

U:   Tabege ma hata bagabaga taringot tu hasesaan ni dosa! Adong do di hita sintua ni malim na songon i, na hundul di siamun ni habangsa ni hatongamon di banua ginjang. Dibahen i tarbahen Ibana do pangoluhon ro di ujungna angka na sandok ro tu Debata marhitehite Ibana; na mangolu do Ibana tongtong, asa ditangianghon nasida. Hasangapon ma di Debata na di ginjang!                   

 

U+H: Amen.  (Hundul)

 

7. Marende BE HKBP No. 100: 2 Mardongan Olopolop Manaek Tuhanta i (BL 155) F=Do 4/4

^♫      Na mulak do Tuhanta tu habangsana i.

        Tu lambung ni Amana, di siamunNa i.

        Disomba sasude na di banua ginjang,

        Tuhanta i na monang, ro sian tano i.

 

8.    Epistel

U:   Tabege ma hata ni Debata turpuk ni Parpunguan di Pesta Parningoatan Ari hananaek ni Tuhan Jesus sadari on sian Surat tu Halak Heber 12: 1-6. (Itajaha ma marsorinsorin.)  Dibahen i nang hita pe, ala na sai torop ni sitindangi humaliang hita, tapeakhon ma nasa na pasorathon ro di dosa na girgir mangkaliangi, jala marbenget ni roha ma hita marlojong tu bagasan paraloan, na sonson di jolonta.

 

H:   Tabereng ma induk ni haporseaon i jala na paujunghonsa, i ma Jesus, na manaonhon parsilangon i, singkat ni las ni roha, tohapNa i hian, so dietong i hailaon, gabe hundul di siamun ni habangsa ni Debata!

 

U:   Paingotingot hamu ma Ibana, na pataontaonhon paraloan sisongon i dompak Ibana sian angka sipardosa asa unang marnaloja hamu, unang mandate tondimuna.

 

H:   Ndang adong dope pola tiris mudarmuna, laho mangalo di parungkilon maralohon dosa i.

 

U:    Nunga lupa hamu di pangapulon na hinatahonNa tu hamu, ala anak hamu, ai ninna do: "Ale anaha, unang tois roham di pangajarion ni Tuhan i, jala unang ho mandele, jumpa dipinsang ho!"

 

H:    Ai diajar Tuhan i do na hinaholongan ni rohaNa, jala dilinsingi do ganup anak na jinangkonNa.

 

U:   I do sahatna. Martua do angka na tumangihon Hata ni Debata jala na umpeopsa.

 

U + H:   Amen.

 

9. Marende BE HKBP No. 657: 1 -2 Ulina i HuriaM i (BL 657) Es=Do 3/4

 

^♫   Ulina i huriaM i na pinapungupunguM i.

     Marpungu do sudena i mamuji Ho Tuhan na sangap i.

     Tangiang nang endena i na pasangaphon GoarMi.

     Sai topot ma huriaM i na pinapungupunguM i,

     Tumpahi ma huriaM i, tumpahi ma huriaM i.

 

… Jongjong ...

 

^♫   Huria ni Tuhanta i, hinophop ni mudarNa i.

     Pahot tongtong pingkiranmi maniop Tuhanmi parholong i.

     Sai unang olo talu ho, bahenon ni sibolis i;

     Sai pangidohon ma gogo tu Raja ni Huria i;

     Tumpahi ma HuriaM i, tumpahi ma HuriaM i.

 

10.  Manghatindanghon Haporseaon

 

U:    Tahatindanghon ma haporseaonta i, songon na hinatindanghon ni donganta sahaporseaon di sandok portibi on. Rap ma hita mandok!

H:   Ahu porsea di Debata Jahowa.. d.u                         (Hundul)

 

11. SUNGGULSUNGGUL

 

12. Marende BE HKBP No. 97:  1… Ingoton ma Sadari on (BL 129) F=Do 3/4 (Pelean Ia, Ib) 

    

 ^♫ Ingoton ma sadari on parnaek ni Tuhan Jesus.

     Tu habangsaNa na tongtong, na so tarbaen be meret.

   Tasomba ma Tuhanta i, naung mulak tu AmaNa i;

   Tapuji ma Ibana.

 

^♫ Ai nunga mungkap dalan i, di angka na porsea.

   Lao mamongoti surgo i malua sian jea.

   Naung mangonai tu sasude, na mangulahon dosa i.

   Pinuji maTuhanta.

 

 

                                 … Musik …

 

^♫ Ianggo las roham tutu, di Jesus i Tuhanta.

Pauba ma roham burju, ihuthon ma Ibana.

Oloi hataNa sasude, sai tiru pambaenanNa pe

Saleleng ho mangolu.

 

^♫  Ai mulak do Tuhanta i, di ari paruhuman.

Sai dabuonNa do disi, sude parhajahaton

Tu api na so mintop i. Alai haholonganNa i

Tu surgo bahenonNa.

 

                                 … Musik …

 

^♫ O Jesus, Tuhannami on, asi rohaM di hami.

Sai tatap hami na dison, di paraloannami.

Patogu hami sasude, tumpahi hami monang be

Ro di ujungna sogot.

 

13. Jamita: Johannes 6: 60-63

 

Asa torop ma sian angka siseanna na umbegesa mandok: Hata na kasar do i; ise pabegebege i?

Alai diboto Jesus ma di bagasan rohana, naung marmungutmungut angka siseanna siala hata i, jadi didok ma tu nasida: Tung ala ni i do hamu targasip?

Beha nama, anggo idaonmuna Anak ni jolma i manaek tu ingananna hian?

Tondi i do na pangoluhon; ndang marguna anggo daging i. Angka hata naung huhatahon tu hamu, Tondi do i dohot hangoluan.

 

 

14. Marende BE HKBP No. 636: 1… Jesus do Raja Bolon i (BL 636) D=Do 8/4 (Pelean II)

 

^♫   Jesus do Raja bolon i, sigomgom nasa na adong.

Hot do harajaonNa i, nang pe marujung tano on.

 

^♫   Tangiang nang pujian i, manaek tu habangsaNa i.

Mansai hushus GoarNa i, binahen ni pelean i.

 

… Musik …

 

 

^♫   Saluhut manisia i, mian do di holongNa i.

Soara ni dakdanak i, manghatindanghon sangap ni_i.

 

^♫   Gok do asi ni roha i, di harajaonNa na hot i.

Malua na tarhurung i, malua sian rante i.

 

… Musik …

 

^♫   O na tinompa hehe ma, pasangap ma Rajanta i.

Suruan pe marende ma, baen sangap di na monang i.

 

15. Tangiang Pelean

 

U:   Tatangianghon ma peleanta! Ale Debata, Amanami na di banua ginjang! Ho do haroroan ni saluhut silehonlehon na denggan dohot nasa ulibasa na mauliutus. Hupasahat hami ma sian na nilehonMi tu hami, peleannami tu Ho. Sai jalo ma i gabe uap na hushus di joloM. Pasupasu ma i jala ramoti asa huparhaseang hami pelean on, patimbulhon harajaonMu di tongatonga ni huriaM dohot di portibi on. Buhai ma rohanami marhitehite TondiM, asa lam hutanda hami godang ni silehonlehonMi tu hami, asa lam girgir hami mandok mauliate tu Ho, marhitehite Jesus Kristus Tuhannami. Amen.

 

H:   (Mangendehon) BE HKBP No. 204: 2 Ndang Tadinghononhu Ho (BL 73) Bes=Do 2/4

       

^♫♪♫   Nasa na nilehonMi, tondi ro di pamatanghu.

Hosa dohot gogongki, ro di saluhut artangku.

Hupasahat i tu Ho, na so unsatonhu do.

 

U:   Ale Tuhan Jesus Kristus, naung manaek tu banua ginjang, na hundul di siamun ni Debata! Hasangapon dohot hamuliaon ma di Ho ro di saleleng ni lelengna. Na marlas ni roha do hami nuaeng ala naung monang Ho, jala dipabangkit Debata Ho gabe Raja di atas ni saluhut. Halongangan do sude dalanMu, ai dipatutoru Ho diriM tu toru ni saluhut, alai gabe tumimbo Ho sian sasude jala maruli Goar, asa lompit saluhut ulu ni tot laho marsomba tu Ho, jala ganup pamangan marhatopothon: Ho do Tuhan! Mauliate ma rohanami tu Ho, ala naung diungkap Ho dalan tu banua ginjang, gabe Sintua ni malim Ho, na mangondihon hami tu Debata. Sai pasupasu ma HuriaM, na maringanan dope  di hasiangan on, paima marpungu hami tu lambungMu. Sai pasaut ma bagabagaM tu angka suruanMu. Lehon tu nasida sahala dohot hagogoon sian banua ginjang, asa marmulia GoarMu di portibi on. Sai ajari ma angka partohonan di HuriaM, asa hombar tu lomo ni rohaM angka aturan, paminsangon dohot panogunoguon na niaturhonnasida di HuriaM. Sai gomgomi jala parentai ma HuriaM di sandok portibi on, asa lam rarat jala monang HuriaM i; lehon hapistaran sian banua ginjang tu angka induknami, tu angka Pandita, Guru, Bibelvrow, Diakones, Sintua dohot Evangelis asa lam maraturan HuriaM di tano on. Sai pajongjong harajaonMu di bagasan rohanami, asa marhiras ni roha hami mangoloi dohot mangihuthon Ho. Pahot ma rohanami tu Ho, asa huhatindanghon hami, mangolu manang mate pe hami: Ho do Tuhannami. Sai paian ma HataM dohot dame di HuriaM, asa huingot hami: ndada hasiangan on inganannami, alai di banua ginjang di lambungMi do. Sai ramoti ma na manggomgomi hami dohot raja dohot suruan na pinabangkitna; lehon tu nasida hapistaran sian banua ginjang dohot unduk ni roha, asa dohot nasida mangoloi parentaM. Pasupasu ma saluhut parpunguan ni halak Kristen, sai Ho ma dongannasida jumpa marpungu di gareja, di parsikolaan, nang pe di bagasna be. Sai lam longkangi sian hami dosa dohot sude na pasorathon hami di hasianganon, asa lam malungun hami, paimahon haroroM mangalap hami tu lambung ni Ama i. Amen.

 

U:   Ale Amanami na di banua ginjang! Sai pinarbadia ma GoarMu! Sai ro ma harajaonMu! Sai saut ma lomo ni rohaM di banua tonga on songon na di banua ginjang! Lehon ma tu hami sadari on hangoluan siapari! Sesa ma dosanami songon panesanami di dosa ni dongan na mardosa tu hami! Unang hami togihon tu pangunjunan! Palua ma hami sian pangago!

 

H:   (Mangendehon:) BE HKBP No. 841 Ai Ho do Nampuna Harajaon Es=Do 4/4

 

Ai Ho do nampuna harajaon dohot hagogoon, ro di hasangapon. Saleleng ni lelengna. Amen.

 

Pdt:   Dipasupasu ...

 

P/R:  (Mangendehon:) BE HKBP No. 845 Amen (3x) HKBP Es=Do 4/4

            Amen, amen, amen.