SEJARAH SINGKAT HKBP CIBITUNG RESORT SOLA GRACIA CIBITUNG DISTRIK XIX BEKASI

 

ACARA PARMINGGUON EXAUDI

ULANG TAON 32

HKBP CIBITUNG

(20 Mei 1991 – 20 Mei 2023)

RESORT SOLA GRACIA CIBITUNG

DISTRIK XIX BEKASI

 

Minggu, 21 Mei 2022

 

& Ev: 2 Samuel 2: 1-7               & Ep: 1 Petrus 5: 6-10

 

 

Topik Minggu:

 

“Ditangihon Jahowa do Suara ni BangsoNa”

 

 

 

 

 

 

 

 

 

 

 

 

Kampung Utan RT 02 RW 09 No. 90 Kel. Wanasari Cibitung

17520 – Bekasi

01.       PANGARADEON

 

-       Parhalado, barisan prosesi, na mamboan Bibel, Lilin dohot Parsilang; mangarade di bilut Parhobasan.

-       Huria mangarade di ingananna be manomunomu uduran prosesi, laos jongjong ma ruas ni huria Parminggu di ingananna be diiringi BE HKBP No. 585 Somba ma Jahowa Debatanta (BL 585) G=Do 4/4

-       Uduran prosesi: Pamboan Bibel, Silang, Lilin, Paragenda, Parjamita, Panitia Tahun Profesionalisme, dohot Sude Parhalado ditomutomu ruas ni huria na di gareja laos jongjong.

 

Bibel:          Ahu do hata hangoluon. Manang ise na tumangihon hatangKi jala na porsea di na marsuru Ahu, nunga sahat tu ibana hangoluan na saleleng ni lelengna.

 

Parsilang:  Ahu do haheheon dohot hangoluan; na mangolu do na porsea di Ahu, nang pe mate ibana. Jala ganup na mangolu jala na porsea di Ahu, na so tupa mate ibana salelenglelengna.

 

Lilin:          Ahu do panondang ni portibi on. Na so tupa mardalan di na holom na mangihuthon Ahu; di ibana do tahe panondang hangoluan.

 

02.       JOUJOU LAHO MAMUJI DEBATA

 

Pdt:   Huria ni Debata na hinaholongan ni Tuhanta Yesus Kristus, horas ma di hita saluhutna! Mauliate ma itadok tu Debata na paojak HuriaNa HKBP Cibitung boho 32 taon di inganan on. Sandok hataridaan ni pandonganion ni Debata do i di hita ruas ni huriaNa saluhutna.

 

R:      Pinuji ma Debata naung mangaramoti huriaNa HKBP Cibitung.

 

Pdt:   Di tingki on tung tama situtu do hita mandok mauliate tu Debata, huhut manghatindangkon denggan basaNa sudena marhite parendeon dohot olopolop, ai holong ni rohaNa i do na mangaramoti hita gabe jumpangan ngolu na masitumpahan songon hataridaan ni pamatang ni Kristus.

 

R:      Marningot asi ni rohaNa na manongtong i, endehononta jala pujionta ma Jahowa.

 

Pdt: Antong marende ma hita itaolophon ma Jahowa ala denggan ni basaNa marhite ende Jubileum ni Huria!

 

 

 

 

03.       Marende BE HKBP No. 653: 1-2  Jubileum ni Huria (BL653) F=Do 4/4

 

¯   Na tama do ingotonta hajongjongan ni hurianta on

       Parningotan hatutubu, di hita sahuria on

       Tolupulu dua taon naung ojak huria on

       Taon parolopolopon do on di na sahuria on.

 

♫    Taolophon denggan basa na itajalo sian Debata

       Saluhut do disarihon, na ringkot di ngolunta on.

       Lam togu ma parsaoran di hita huriaNa on

       Radot masitangiangan ma, masiurupan hita on.    

 

… Musik …

 

¯   Ruas angka na matua baen tiruan hita tongtong.

Maradophon anakhonta, tangkas ma ingot i tongtong.

Sundut na umposo i do na sumingkati hita on.

Togutogu, tangianghon ma asa jonok tu Debata.

    

04.       VOTUM – TANGIANG

 

L:      Marhitehite Goar ni Debata Ama dohot Goar ni AnakNa Tuhan Yesus Kristus dohot Goar ni Tondi Parbadia na tumompa langit dohot tano on.

 

R:      Amen.

 

L:      Songon on do didok Tuhan Jesus: Lehonon ni Amamuna na di banua ginjang i do Tondi Parbadia tu angka na mangidohonsa. Marsoara olopolop ma hamu paboahon, patubegehon hata i, pasar hamu ma i ro di ujung ni tano on, dok hamu ma, Nunga dipalua Jahowa naposoNa si Jakob. Marolopolop tu Debata ma ho, ale sandok tano on! Endehon hamu ma hamuliaon ni GoarNa, marmulia ma bahen hamu pujipujianNa. Haleluya!

 

R:      (Mangendehon: Haleluya, haleluya, haleluya!)

 

L:      (Martangiang ma hita:) Ale Tuhan Debata, Pargogo na so hatudosan, Amanami na di banua ginjang i! Usehon ma TondiM na badia i dohot hapistaran na sian Ho i tu saluhut HuriaM, asa lam rarat jala lam hot HataM na badia i di tongatonga ni hami on. Lehon ma hiras ni roha di naposoM manjamitahon HataM, asa lam pita jala lam ganda HuriaM na badia i. Patongtong ma huhut rohanami mangoloi Ho sahat ro di ujung di bagasan haporseaon na ture. Na mandok mauliate do hami tu Ho, di sude denggan ni basaM. Tung so tarasam do angka pambahenanMu, na mandongani dohot na mamasumasu sude hami ruasMon. Nunga 32 taon naung ojak huriaM HKBP Cibitung on jala huingot hami ma i nuaeng, mandok mauliate tu Ho. Ala ni i hupuji hami ma goarMu, pinaloasMu lam mangerbang huriaM on dohot lam bolak panghobasionna. Dilehon Ho do sada ni roha di sude ruasMu jala didongani Ho do nang angka parhaladoM laho marhaladoi di huriaM i. Antong sai saut ma lomo ni rohaM, jala lam rarat harajaonMu ala ni huriaM on, di bagasan Goar ni anakMu Tuhan Jesus Kristus Sipalua hami. Amen. -Hundul-

 

05.       Marende BE HKBP No. 656: 1-2 Parhahamaranggion (BL656) B=Do 4/4

 

¯   Parhahamaranggion i, lam hot jala togu
Singkop ma hasadaon i, di Jesus i burju
Rap sauduran hita be marholong na tutu
Mardame, marlas roha ma di Jesus i tutu.

 

¯   Togu ma hasadaon i; di ojahanna i
Sada haporseaon i, di Tuhan Jesus i
Ai sada pandidion i, ai sada Ama i
Sada ma hita Kristen i manomba Tuhan i.

 

06.       PATIK

 

L:      Tangihon hamu ma patik ni Debata! PATIK PARJOLO: Ahu do Jahowa Debatam! Ninna Debatanta. Ndang jadi marangkup Ahu bahenonmu Debatam. Dia do lapatan ni i?

 

R:      On do: Ingkon umbiar rohanta jala humolong jala umpos mida Debata asa mida nasa na adong.

 

L:      PATIK PADUAHON: jadi ganaonmu jala ndang jadi sumanonmu manang aha na di banua ginjang dohot na di banua tonga on ro di na di bagasan aek na di toru ni tano, ianggo tu gabe sisombaon manang sioloan. Dia do lapatan ni i?

 

R:      On do: Ingkon dihabiari rohanta Debata jala ingkon holong rohanta di Ibana, asa ndang jadi iba marsomba tu sombaon manang tu ganaganaan, mangido hangoluan sian i, jala ndang jadi oloan begu manang ulpuhan ni hadatuon, jala ndang jadi pos roha di ugasan homitan.

 

L:      PATIK PATOLUHON: Ndang jadi dohonon goar ni Debata, ianggo so ture dalanna. Ai hona uhumNa do sogot angka na marsineang di goarNa.  Dia do lapatan ni i?

 

R:      On do: Ingkon dihabiari rohanta Debata jala ingkon holong rohanta di Ibana, asa unang hita olo mamurai manang manolonnolon manang marujarujaran na roa, manang mangansi marhitehite Goar ni Debata; ai di na tarsosak dohot di tangiang dohot di pujipujian do sidohonon Goar ni Debata.

 

L:      PATIK PAOPATHON: Ingot hamu ma pabadiahon ari minggu! Di na onom ari ma ula hamu nasa siulaonmu; alai anggo ari papituhon i, ari paradianan ni Jahowa Debatam do i. Ndang jadi ho mangula anggo di na sadari i, manang anakmu pe manang borum, manang naposom lahilahi, manang naposom boruboru, ro di pinahanmu ro di pangisi ni huta ni halak pe na mangebati hutam. Ai di na onom ari do ditompa Debata langit  dohot tano dohot laut dohot nasa isina; dung i maradian do Ibana di ari papituhon i. Dibahen i do umbahen na dipasupasu Debata Jahowa ari paradiananNa i jala diparbadia i. Dia do lapatan ni i?

 

R:      On do: Ingkon dihabiari rohanta Debata jala ingkon holong rohanta di Ibana, asa unang tois rohanta di ajar na sian Hata ni Debata, ingkon badia do Hata ni Debata di rohanta jala ingkon ringgas rohanta tumangihon dohot mangguruhon.

 

L:      PATIK PALIMAHON: Ingkon pasangaponmu do natoras mu asa martua ho, jala leleng mangolu di tano na nilehon ni Jahowa Debatam di ho. Dia do lapatan ni i?

 

R:      On do: Ingkon dihabiari rohanta Debata jala ingkon holong rohanta di Ibana, asa unang lea rohanta mida natorasta dohot mida angka rajanta ro di angka natuatua. Ndang jadi paroonta rimas nasida, ingkon pantun do hita jala ingkon holong rohanta tu nasida, sioloan do nasida jala sisubuton do rohana.

 

L:      PATIK PAONOMHON: Unang ho mamunu! Dia do lapatan ni i?

 

R:      On do: Ingkon dihabiari rohanta Debata jala ingkon holong rohanta di Ibana, asa unang hita olo mambahen sahitsahit tu nasa na mangolu, ingkon roha pangoluhon do rohanta di nasa na mangolu.

 

L:      PATIK PAPITUHON: Unang ho mangalangkup! Dia do lapatan ni i?

 

R:      On do: Ingkon dihabiari rohanta Debata jala ingkon holong rohanta di Ibana, asa toman rohanta jala porman dohot pangalahonta ro di hatanta, ianggo angka naung marbagas i ingkon masiparhamaolon jala masihaholongan.

 

L:      PATIK PAUALUHON: Unang ho manangko! Dia do lapatan ni i?

 

R:      On do: Ingkon dihabiari rohanta Debata jala ingkon holong rohanta di Ibana, asa unang hita olo mandobo hepeng ni dongan jolma manang mambahen bisukbisuk mangalansumhon boniaga, ingkon sipagandaon ni rohanta do arta ni dongan jala siramothononhon.

 

L:      PATIK PASIAHON: Unang ho olo manghatindanghon hata na so tutu maralohon dongan jolma.

 

R:      On do: Ingkon dihabiari rohanta Debata jala ingkon holong rohanta di Ibana, asa unang hita olo manggapgapi dongan jolma manang manjehehon manang pahatahatahon, paoruhon sangap nasida, ingkon niampinan do dongan jolma anggo so tangkas dope binoto salana. Holan uhum na denggan i do paboaboaon.

 

L:      PATIK PASAMPULUHON: Ndang jadi haliangan ni roham bagas ni donganmu, ndang jadi haliangan ni roham dongan saripe ni donganmu, manang naposona baoa manang naposona boruboru, manang lombuna manang hodana, manang dia pe ugasan ni donganmu. Dia do lapatan ni i?

 

R:      On do: Ingkon dihabiari rohanta Debata jala ingkon holong rohanta di Ibana, asa unang hita olo marangkal mangarohai ugasan ni dongan jolma dohot ugasan tinadingkon ni ompuna, siurupon do nasida mangaramoti nasa ugasanna. Angkup ni i ndang jadi bolabolaonta pardihuta ni dongan jolma manang naposona pe, siapoan do nasida jala sidasdasan mandapothon ulaonna hian.

 

L:      BEHA DO PANDOK NI DEBATA TARINGOT TU PATIK NA SAMPULU I? On do: Ahu do Jahowa Debatam! Ninna Debatanta, pargogo na so hatudosan jala parrimas, sai luluhononku do dosa ni amaama tu pinomparna ro di sundut patoluhon, ro di sundut paopathon, pinompar ni angka na sogo roha di Ahu, alai asi do rohangKu di angka na marriburibu angka na marholong ni roha di Ahu, na so mangalaosi patikHi. Dia do lapatan ni i?

 

R:      On do: Dipalumba Debata do hita disi, didok do pinsangonNa nasa na mangalaosi patikNa. Dibahen i tama do dihabiari rohanta rimasNa, unang ma nilaosan patikNa. Alai diparbagabaga do asi ni rohaNa, angkup ni i nasa na denggan di angka na so mangalaosi parikNa. Dibahen i tama ma haholongan ni rohanta dohot haposan ni rohanta Ibana, jala las rohanta mangoloi patikNa.

 

L:      Antong rap mangido gogo ma hita tu Tuhan Debata laho mangulahon patikNa.

 

R:      Ale Tuhan Debata sai pargogoi ma hami, laho mangulahon na hombar tu patikMi. Amen.

 

07.       Marende BE HKBP No. 686: 1-2  Ramun do Au (BL686) D=Do 6/4

 

¯   Ramun do au di joloM i, gok dosangki urasi au

       O, Jesus, birubiru i, dison do au patau ma au.

 

… Jongjong …

 

¯   Na ro do au tu joloM i, gale do au urupi au

       O, Jesus, ala mudarMi, dison do au patau ma au.

 

08.       MANOPOTI DOSA – BAGABAGA

 

L:      Tatopoti ma dosanta! Ale Tuhan Debata, Amanami, Pargogo na so hatudosan, Parasiroha mida hami na dangol on! Na ro do hami tu joloM manopoti dosanami na godang i. Di bagasan hajahaton do hami tubu jala ndang adong haporseaon di bagasan rohanami hian, saluhut do hami manimbil sian angka dalanMu. Mansai godang do pangalaosionnami di PatikMu. Alai ingot ma hami, ale Tuhan, ala ni denggan ni basaM dohot asi ni rohaM. Sai unang paingotingot angka dosa ni haposoonnami dohot pangalaosionnami; sai ingot ma hami hombar tu asi ni rohaM dohot denggan ni basaM ala ni GoarMu. Ale Tuhan Jesus, marpamuati ma rohaM di dosanami na godang i! Ale Debata parasiroha na sumurung, nunga ojak huriaM 32 taon lelengna, nunga torop naung tarpasupasu marhite huriaM i, alai sai torop dope hami na dangoldangol sisilon marhuria, jala adong dope na losok ro tu parmingguan, hurang ringgas di ragam ni parsaoran ni huria. Ale Tuhan asi ma roham di hami. Ale Debata na Badia, nunga hujalo hami pasupasuM marhite huriaM HKBP. Nunga gabe partalian jala teanteanan partondion huriaM i di hami. Boi hami marhite huriaM i mandai na tonggi sian Ho. Ale Tuhan asi ma roham di hami ai na gale jala na lemba do hami laho pateanhon partalian i ma huriaM HKBP tu angka ianakhonnami, ala ni i asi ma rohaM di hami.

 

… Musik angonangon BE HKBP

No. 686: 1 Ramun Do Au BL 686 D=Do 6/4 …

 

L:      Ale Debata sitompa saluhut, suanhon ma tu rohanami roha manghaholongi angka habatahonnami. Ala huboto hami, molo huhaholongi hami hata Batak gabe i ma dalannami manghaholongi Bibel na marhata Batak, Buku Ende, Agenda parmingguon ni huriaM HKBP. Tamba ma muse holong ni rohanami tu partuturon, pahean ulos, panortoron dohot godang dalan patuduhon parsaoran na ture na hombar tu hataM, naung gabe teanteanan di hami. Sian saluhutna i, alai andul ummarga dope hataM i na badia i. Ale Tuhan asi roham unang bahen hami dao sian Ho. Ale Tuhan Debata, Amanami, Parasiroha na sumurung! Ndada mangasahon hatigorannami, na mangasahon asi ni rohaM na godang i do. Sai asi ma rohaM mida sandok bangsonami, sesa ma dosanami saluhutna. Tarlumobi di masa pandemi Covid 19 on dohot ni bibiaran barita Hepatitis na masa, haru palua ma sandok tano on sian hamaolon na manosak ngolu ni jolma di portibi on, asi rohaM ale Tuhan, Ho do haporusannami. Sai sungguli ma rohanami, asa muba roha dohot pangalahonami, ala ni Tuhan Jesus Kristus Tuhannami, sipangoluhami.

 

R:      (mangendehon BE HKBP No. 686: 3 Ramun do Au (BL686) D=Do 6/4)

 

¯   Ala denggan ni basaM i, ro au tu Ho, O Jesuski,

       Parbadiai ma rohangki, dison do au patau ma au.

 

L :     Tabege ma hata bagabaga taringot tu hasesaan ni dosa: Songon on do Hata ni Tuhan Jahowa: Nunga diarsahi ho Ahu marhite sian angka dosam, jala nunga dilojai ho Ahu marhite sian angka hajahatonmu. Ahu tutu, Ahu sandiri manalesei angka pangalaosim ala ni hadirionKu, jala ndang be hupaingotingot angka dosam. Hasangapon ma di Debata na di ginjang.

 

 R:     Amen.      (Hundul)

 

09.       Marende BE HKBP No. 754: 1-2  Gok Las ni Roha  (BL754) C=Do 4/4

 

¯   Gok las ni roha do au di ngolungkon, di ngolungkon, di ngolungkon.

Gok las ni roha do au di ngolungkon, tongtong di rohangkon
Ref.:    Mauliate gok las ni roha, maringan holongMi Tuhan di au

                   Mauliate gok las ni roha, maringan holongMi Tuhan di au.

 

¯   Mardame jala sonang do ngolungkon, di rohangkon, di rohangkon. Mardame jala sonang do ngolungkon tongtong di rohangkon
Ref.:    Mauliate gok las ni roha, maringan holongMi Tuhan di au

                   Mauliate gok las ni roha, maringan holongMi Tuhan di au.

 

10.       MANJAHA HATA NI DEBATA 1 Petrus 5: 6-10

  

L:      Tabege ma hata ni Debata turpuk ni minggu on, sian Surat ni Apostel Petrus Naparjolo 5: 6-10 Antong, patutoru hamu ma dirimuna tutoru ni tangan ni Debata na gogo i, asa dipatimbo hamu di tingkina i!

 

R:      Tinggangkon hamu ma nasa na hinolsohon ni rohamuna tu Ibana, ai disarihon do hamu!

 

L:      Torang ma rohamuna, dungo ma hamu; na maotaot do alomuna, sibolis i, songon babiat na marauang, mangalului sibondutonna.

 

R:      Gomos ma hamu mangalo ibana marhitehite haporseaon; ingot hamu ma: Ndang tarbahen so songgop angka haporsuhon sisongon i, nang tu angka hahaanggimuna na di portibi on.

 

L:      Alai anggo Debata, nampuna saluhut asi ni roha, naung manjou hamu tu hasangaponna na manongtong i di bagasan Kristus, pauliulionna, pahotonna jala patoguonna do hamu, dung jolo ditaon hamu satongkin haporsuhon i. I do sahatna! Martua do angka na tumangihon hata ni Debata jala na umpeopsa.

 

S:      Amen.

 

11.       Marende BE HKBP No. 774: 2+4  Tung Mabaor Sian Ho (BL774) G=Do 4/4

 

¯   Ai huboto do tangkas hagogoonMi Tuhan.

Ho do na so hatudosan na tongtong Ho pasangapon.

Las rohangku pasangaphon, ro marsomba tu joloM.

Ro marsomba tu joloM, ro marsomba tu joloM,

Ro marsomba tu joloM.

… Jongjong …

¯   Huhilala holongMi na manogu rohangki.

Unang loas au be lilu manadinghon Ho Tuhanhu.

Pandang i do tujuonhu saleleng di ngolungki.

Saleleng di ngolungki, saleleng di ngolungki,

Saleleng di ngolungki.

 

12.       MANGHATINDANGKON HAPORSEAON

 

L:      Tahatindangkon ma haporseaonta i songon na hinatindanghon ni donganta sahaporseaon di sandok portibi on on, rap ma hita mandok:

 

R:      Ahu porsea … dst.         -hundul-

 

13.       TINGTING

 

14.       MANDOK HATA

a.     Mewakili Panitia:

b.     Mewakili Ruas:

c.     Mewakili Parhalado:

­

15.       Marende BE HKBP No. 651: 1…  Huria na Huhaholongi Hami (BL651) B=Do 4/4 (Pelean Ia+Ib)

 

¯   Huria na huhaholongi hami, na pinajongjong ni Tuhanta i
Tung na so lupa sian rohanami, Huria i dohot ruasna i

Di nasa hasusaan, tongtong do i manahan
Ref.:    Manggogo pe angka galumbang i

            Tuhanta do na pademakhon i, martua do na not di Tuhan i.

 

¯   Marpadan do au on tu Debatangku, tu Jesus Raja ni Huria i
Sai pangkeonku do nasa gogongku, mangaradoti huriaNa i
Tung ro pe haleaon ingkon huhabengethon
Reff:   Manggogo pe angka galumbang i

            Tuhanta do na pademakhon i, martua do na not di Tuhan i.

 

                 … Musik …

¯   Huria na hinophop ni Tuhanta, sai mian ma di haholongon i
Sahata ma pangula nang ruasNa, manomba Jesus na marsangap i
Sai timbul hadameon lam tang haporseaon
Ref.:    Manggogo pe angka galumbang i

            Tuhanta do na pademakhon i, martua do na not di Tuhan i.

 

16.       JAMITA:  2 Samuel 22: 1-7

 

“Ditangihon Jahowa do Soara ni BangsoNa”

 

1.     Dung i dihatahon si Daud ma tu Jahowa angka hata ni ende on, di ari dung na pinalua ni Jahowa ibana sian tangan ni saluhut musuna dohot sian tangan ni si Saul.

2.     Ninna ma: Jahowa do dolok batu di ahu dohot haporusanku, jala sipalua ahu.

3.     Debata do partanobatoanku, marhaposan tu ibana do ahu, lombulombungku dohot tanduk ni partuaonku, parondingondinganku dohot haporusanku, sipartumpak di ahu, Ibana palua ahu sian uhum gogo.

4.     Sai hupajoujou do Jahowa, na tama sipujion i, jadi malua ma ahu sian angka musungku.

5.     Nunga pola dihaliangi angka ombak ni hamatean ahu, angka sunge ni hajahaton manonggoti ahu.

6.     Nunga pola dihaliangi angka rante ni banua toru ahu, dilungkupi angka jorgong ni hamateani ahu.

7.     Jadi di na targogot i ahu, hujou do Jahowa, jala hupangiar anggukku tu Debatangku, jadi ditangihon Ibana soarangki sian jorona, jala tolhas angguk i tu pinggolna.

 

 

 

13.       Marende BE HKBP No. 792: 1…  Pasupasu Hami O Tuhan (BL792) D=Do 4/2 (Pelean II)

 

       Ref.:    Pasupasu hami O Tuhan, sai usehon dameM i

                   Sai ampehon tanganMi Tuhan, Lehon tu au gogoM i.

¯   Di portibi on baen ma au Tuhan, habaoran ni las ni roha

       Tu na marsak i, tu na dangol i gabe pangapuli i.

 

       Ref.:    Pasupasu hami O Tuhan, sai usehon dameM i

                   Sai ampehon tanganMi Tuhan, Lehon tu au gogoM i.

¯   Diportibi on, baen ma au Tuhan, monang maralohon dosa

       Dibaen gogoM i, talu musu i sibolis pangago i

Ref.:    Pasupasu hami O Tuhan, sai usehon dameM i

                   Sai ampehon tanganMi Tuhan, Lehon tu au gogoM i.

 

… Musik …

¯   Diportibi on, baen ma au Tuhan, sipatupa hadameon

       Baen ma hataMi, saor tu roha ni na masihosoman i
Ref.:    Pasupasu hami O Tuhan, sai usehon dameM i

                   Sai ampehon tanganMi Tuhan, Lehon tu au gogoM i.

 

¯   Diportibi on, baen ma au Tuhan, siradoti haholongon
Togutogu ma, hami on Tuhan, marparange na denggan

Ref.:    Pasupasu hami O Tuhan, sai usehon dameM i

                   Sai ampehon tanganMi Tuhan, Lehon tu au gogoM i.

 

14.       TANGIANG PELEAN (Jongjong)

 

U:   Tatangianghon ma peleanta! Ale Debata, Amanami na di banua ginjang! Ho do haroroan ni saluhut silehonlehon na denggan dohot nasa ulibasa na mauliutus. Hupasahat hami ma sian na nilehonMi tu hami, peleannami tu Ho. Sai jalo ma i gabe uap na hushus di joloM. Pasupasu ma i jala ramoti asa huparhaseang hami pelean on, patimbulhon harajaonMu di tongatonga ni huriaM dohot di portibi on. Buhai ma rohanami marhitehite TondiM, asa lam hutanda hami godang ni silehonlehonMi tu hami, asa lam girgir hami mandok mauliate tu Ho, marhitehite Jesus Kristus Tuhannami. Amen.

 

R:   (Mangendehon) BE HKBP No. 204: 2 Ndang Tadingkononhu Ho (BL73) B=Do 2/4

 

¯  Nasa na nilehonMi, tondi ro di pamatanghu

Hosa dohot gogongki, ro di saluhut artanghu

Hupasahat i tu Ho, na so unsatonhu do.

 

U:   Ale Amanami na di banua ginjang! Sai pinarbadia ma GoarMu! Sai ro ma harajaonMu! Sai saut ma lomo ni rohaM di banua tonga on songon na di banua ginjang! Lehon ma tu hami sadari on hangoluan siapari! Sesa ma dosanami songon panesanami di dosa ni dongan na mardosa tu hami! Unang hami togihon tu pangunjunan! Palua ma hami sian pangago!

 

R:   (Mangendehon BE HKBP No. 841 (BL841) B=Do 4/4)

 

¯  Ai Ho do nampuna harajaon, dohot hagogoon

Ro di hasangapon, saleleng ni leleng na. Amen.

 

U:   Tangiang Pelean - Pasupasu

R: (Mangendehon BE HKBP No. 845 (BL845) Bes=Do 4/4) Amen, Amen, Amen.

 

 

 

SELAMAT ULANG TAHUN 32