SENEN, 29 MEI 2023 PARNINGOTAN ARI HASASAOR NI TONDI PARBADIA

 

PARTORDING NI PARMINGGUON

MINGGU PENTAKOSTA II

PARNINGOTAN ARI HASASAOR NI TONDI PARBADIA

 

& Ev: 4 Musa 11: 24-30       & Ep: 2 Petrus 1: 16-21

 

TOPIK MINGGU:

NDANG HASUHATAN HUASO NI TONDI NI DEBATA

 HKBP CIBITUNG

RESORT SOLA GRACIA CIBITUNG

 

SENEN, 29 MEI 2023

 

1.       Marende BE. HKBP No. 461: 1-3  Songgop Tu Hami (BL407) G=Do 4/4

 

^♫♪♫   Songgop tu hami na di joloM on, O Tondi ni Debatangki.

Uhir patikMu tu rohangkinon, O Tondi ni Debatangki.

Bereng siholhu di haroroM i, molo Ho ro, nda hisar tondingki.

Didihon ma tu au on apiM i, O Tondi ni Debatangki.

 

^♫♪♫  Suru TondiM paluahon au on, palua ma, O Debata.

Bereng daginghu, tondingku dison, palua ma, O Debata.

Dao ma pangambat di soaraM i, hisap ni daging, sandok diringki.

Na mangarsahi tongtong TondiM i, palua ma, O Debata.

 

… Musik ...

(Jongjong)

 

^♫♪♫  Lehon hataM, i ma tau podanghi, Debatangki na gogo i.

Asa sai talu sude musuM i, Debatangki na gogo i.

Manghatindanghon tongtong goarMi, asa malua pardosa disi.

Asa dijangkon Tuhanta ma i, Debatangki na gogo i.

 

2.    Votum – Tangiang

U:   Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Parbadia na tumompa langit dohot tano on. Amen. Sian Sion, situan ni hinadenggan, marsinondang Debata. Sai na ro do Debata, jala ndang tagamon hohom Ibana: ai songon on do didok Jahowa: UsehononHu ma tutu TondingKu tu pinomparmuna nuaeng jala pasupasungKu tu pinomparmu sogot. Jahowa do Debata, jala Ibana manondangi hita. Tambathon hamu ma angka pelean pesta i sahat ro di angka tanduk ni langgatan. Haleluya!

 

H:   (Mangendehon) BE HKBP No. 852: 1 HALELUYA HKBP (3x) (BL 852) G=Do 4/4

       Haleluya, haleluya, haleluya.

 

U:   (Martangiang ma hita:) Ale Tuhan Jesus! Hudok hami mauliate tu Ho sian nasa rohanami, ala dipaojak Ho huriaM di tano on, jala ala dohot hami dijou Ho tusi. Sai suru ma Tondi Parbadia tu rohanami, asa tung huparhatopot hami Ho hangoluannami, asa lohot tu Ho hami marhitehite haporseaon na sintong, jala asa tongtong huhalashon hami pasangaphon GoarMu, na tarpuji ro di saleleng ni lelengna. Amen.

       (Hundul)

3.    Marende BE. HKBP No. 109: 1+3 Sai Songgopi Hami on (BL78) As=Do 4/4

 

^♫♪♫  Sai songgopi hami on ale Tondi Parbadia.

Sai ajari ma tongtong Hami on huhut paria.

Martangiang tu Tuhanta asa tongtong oloanNa.

 

^♫♪♫  Jolma manisia pe sai sondangi ma luhutna.

Asa olo sasude ro tu Jesus Sipalua.

Rarat baen harajaonNa tu saluhut manisia.

 

4.    P a t i k  N I  D e b a t a

 

U:   Tatangihon ma Patik ni Debata di Minggu Pentakosta II Parningotan Ari Hasasaor ni Tondi Parbadia, i ma Patik I-X. Patik parjolo: Ahu do Jahowa DebataM, ninna Debatanta. Ndang jadi marangkup Ahu bahenonmu Debatam.

       PATIK PARJOLO: Ahu do Jahowa Debatam! Ninna Debatanta. Ndang jadi marangkup Ahu bahenonmu Debatam. Dia do lapatan ni i?

       PATIK PADUAHON: jadi ganaonmu jala ndang jadi sumanonmu manang aha na di banua ginjang dohot na di banua tonga on ro di na di bagasan aek na di toru ni tano, ianggo tu gabe sisombaon manang sioloan. Dia do lapatan ni i?

       PATIK PATOLUHON: Ndang jadi dohonon goar ni Debata, ianggo so ture dalanna. Ai hona uhumNa do sogot angka na marsineang di goarNa.  Dia do lapatan ni i?

       PATIK PAOPATHON: Ingot hamu ma pabadiahon ari minggu! Di na onom ari ma ula hamu nasa siulaonmu; alai anggo ari papituhon i, ari paradianan ni Jahowa Debatam do i. Ndang jadi ho mangula anggo di na sadari i, manang anakmu pe manang borum, manang naposom lahilahi, manang naposom boruboru, ro di pinahanmu ro di pangisi ni huta ni halak pe na mangebati hutam. Ai di na onom ari do ditompa Debata langit  dohot tano dohot laut dohot nasa isina; dung i maradian do Ibana di ari papituhon i. Dibahen i do umbahen na dipasupasu Debata Jahowa ari paradiananNa i jala diparbadia i. Dia do lapatan ni i?

       PATIK PALIMAHON: Ingkon pasangaponmu do natoras mu asa martua ho, jala leleng mangolu di tano na nilehon ni Jahowa Debatam di ho. Dia do lapatan ni i?

       PATIK PAONOMHON: Unang ho mamunu!

       PATIK PAPITUHON: Unang ho mangalangkup!

       PATIK PAUALUHON: Unang ho manangko! Dia do lapatan ni i?

       PATIK PASIAHON: Unang ho olo manghatindanghon hata na so tutu maralohon dongan jolma.

       PATIK PASAMPULUHON: Ndang jadi haliangan ni roham bagas ni donganmu, ndang jadi haliangan ni roham dongan saripe ni donganmu, manang naposona baoa manang naposona boruboru, manang lombuna manang hodana, manang dia pe ugasan ni donganmu.

       BEHA DO PANDOK NI DEBATA TARINGOT TU PATIK NA SAMPULU I? On do: Ahu do Jahowa Debatam! Ninna Debatanta, pargogo na so hatudosan jala parrimas, sai luluhononku do dosa ni amaama tu pinomparna ro di sundut patoluhon, ro di sundut paopathon, pinompar ni angka na sogo roha di Ahu, alai asi do rohangKu di angka na marriburibu angka na marholong ni roha di Ahu, na so mangalaosi patikHi.

 

U:   Antong rap mangido gogo ma hita tu Tuhan Debata laho mangulahon patikNa.

 

R:   Ale Tuhan Debata sai pargogoi ma hami, laho mangulahon na hombar tu patikMi. Amen.

 

5.    Marende BE. HKBP No. 681: 1-2 Ale Amang Asi RohaM (BL681) G-Do 4/4

 

^♫♪♫  Ale Amang asi rohaM, di au pardosa on.

Unduk do rohangkon nuaeng, marsomba di joloM.

Unang jujur unang jujur, angka dosangki.

Sai salpuhon sai salpuhon sian rohaM i.

 

(Jongjong)

 

^♫♪♫  Amang sai pargogoi ma au di hasiangan on.

TondiM pasaor tu tondingkon pamalum rohangkon.

Sai usehon, sai usehon TondiM i tu au.

Asa monang maralohon parungkilon au.

 

6.    Manopoti Dosa

 

U:   Tatopoti ma dosanta! Ale Tuhan Debata, Pargogo na so hatudosan jala Ama Parasiroha! Ndang lomo rohaM mida hamatean ni pardosa; mulak ma nian parjahat i tumadingkon dalanna, asa mangolu ibana, i do dipangido rohaM. Ala ni i umbahen dipangido hami; sai sundati ma torutoruM asa unang mangonai be tu hami. Sai sesa sude dosanami, asa mangolu hami di bagasan asi ni rohaM. Sai pargogoi ma hami, asa margogo hami, marhitehite Tuhan Jesus Kristus, Tuhannami. Amen.

 

Musik:             …. Instrument BE HKBP No. 109: 1…

 

U:   Tabege ma hata bagabaga taringot tu hasesaan ni dosa! Songon on do Hata ni Tuhan Jesus: Ro ma hamu tu Ahu, hamu angka na loja jala na sorat, hupasonang pe hamu. Buat hamu ma augangKu tu hamu, guruhon hamu ma sian Ahu, ai na lambok do Ahu jala na serep marroha, asa dapotan hasonangan tondimuna. Ai lambok do augangHu jala neang do dohot na hupaporsanhon. Hasangapon ma di Debata na di ginjang!

 

U+H:     Amen.

 

7.    Marende BE. HKBP No. 464: 1+3 Huboan Ma Diringku (BL313) Es-Do 6/6

 

^♫♪♫  Huboan ma diringku, Tuhan hibul tu Ho.

Ai au do tinobusMu, umbaen tarbaen au ro.

Pagalak ma rohangku dison managam au.

TondiM i ma suru, na boi manggomgom au.

 

^♫♪♫  Ias do au diburi Ho ale Tuhanhi.

Naeng dohot parulanhu hombar tu hataM i.

Pagalak ma rohangku, dison managam au

TondiM i ma suru, na boi manggomgom au.

 

8.    MANJAHA HATA NI DEBATA

 

U:   Hata ni Debata turpuk di Minggu Pentakosta II Parningotan Ari Hasasaor ni Tondi Parbadia sadari on, tarsurat  di Buku Petrus na Paduahon 1: 16-21. Ai ndada huihuthon hami angka turiturian na piningkir ni na bisuk di na hupabotohon hami tu hamu hagogoon dohot haroro ni Tuhanta Jesus Kristus; tung diida matanami do hatongamonNa i.

 

H:    Ai dijalo do hamuliaon dohot hasangapon sian Debata Ama, di na masa tu Ibana sian hasangapon na tongam i soara on: “On do AnakHu, haholongan ni rohangKu; na lomo do rohangKu di Ibana.”

 

U:    I ma soara, na hubege hami ro sian banua ginjang i, uju rap hami dohot Ibana di dolok na badia i.

 

H:    Jadi lam hot ma antong hata panurirangon i di hami; jala tama marsitiopan tusi ma hamu, songon na tu palito na marsinondang di inganan na holom, paima tarida siulubalang ari i, jala binsar siboan hatiuron di bagasan rohamuna.

 

U:    On ma parjolo boto hamu: Ndang dapot hatorangan ni nasa panurirangon na tarsurat, anggo sian roha ni jolma.

 

H: Ai ndang dung sian tahi ni jolma haroroan ni panurirangon; alai tinogihon ni Tondi Parbadia do umbahen na marsoara angka jolma, disuru Debata.

 

U:   I do sahatna. Martua do angka na tumangihon Hata ni Debata jala na umpeopsa.

 

U+H : Amen.

 

9.    Marende BE. HKBP No. 640: 1-2 Haholongan Sian Ginjang (BL640) A=Do 4/4

 

^♫♪♫   Haholongan sian ginjang las ni roha na hot i.

Tumpal ni asi ni roha sai bongoti rohangki.

Jesus na gok asi roha dohot haholongon i.

Baen malua, baen martua hami na tahutan i.

 

(Jongjong)

 

^♫♪♫  Lehon  tondi haholongon tu parroha na bojok.

Bagabaga hadameon sahat baen tu hami on.

Jesus Alpha nang Omega bona ni haporseaon.

Sai padao ma angka dosa, sai palua hami on.

 

10.  Manghatindanghon Haporseaon

 

U:   Tahatindanghon ma haporseaonta i, songon na hinatindanghon ni donganta sahaporseaon di sandok portibi on. Rap ma hita mandok!

H:   Ahu porsea di Debata Jahowa.. d.u.

       (Hundul)

11. SUNGGULSUNGGUL

 

12. Marende BE. HKBP No. 108: 1 ... Hata ni Jahowa (BL203) Es=Do 3/4   (Pelean Ia, Ib) 

    

^♫♪♫  Baen ma gabagaba, dohot bungabunga, nang pelean i.

Ai nuaeng ma jumpang, ari parningotan, Pentakoste i.

Haroro ni Tondi do, i ma Tondi Parbadia, masuk tu huria.

 

^♫♪♫  Jangkon ma Ibana, ai asi rohaNa, ro tu hita on.

Asa sondangonNa, tiur bahenonNa, parrohaon tongtong.

Jangkon ma Ibana da, asa lao sude arsakmu, nang pardangolanmu.

 

--- Musik ---

 

 ^♫♪♫ Tondi pangapuli, sahap na ummuli, di sisean i.

Tuhan Jesus Kristus ro ma Ho pabulus tongtong langkangki.

Di na lao tu surgo au, pargogoi ma au pamonang sahat tu na sonang.

 

13. J a m i t a 4 MUSA 11: 24-30

            

14. Marende BE. HKBP No. 106: 1 --- Ale Tuhan Amanami (BL176) F=Do 6/4 (Pelean II)

 

^♫♪♫  Ale Tuhan Amanami, na marholong roha i,

Suru TondiM i tu hami, angka na tinoguM i.

Paimbaru tondingki, gabe joroM i ma i.

Sai oloi pangidoanku sian asi ni rohaMu.

 

♫♪♫         Ndang adong hangoluanku, anggo so ro TondiM i,

Maringanan di rohangku, jala ndang margogo i.

Patupahon hataM i, pasangaphon GoarM i;

Sai tongtong holom rohangku, molo so patiuronMu.

 

… Musik ...

 

♫♪♫    Tung beha ma tandaonku, Ho, O Jesus Tuhanki?

Tung beha ma tolopanku; Ho do hangoluanki.

Molo so ro tondiM i manondangi rohangki?

Ipe suru ma Ibana asa saor tu au hataNa.

 

♫♪♫    Arta na tongtong manahan salelenglelengna i,

Ingkon Ho do marbasahon jala mangalehon i,

Tondi sian Debata; ala ni tangihon ma

Hata ni pangidoanku: Sai bongoti ma rohangku.

 

… Musik …

 

♫♪♫    Patandahon ma tu ahu, dosa na buni dope,

Angka na paholang ahu sian Debata tahe,

Asa topotanku i tu Tuhanku Jesus i,

Jala au paluaonNa sian dosa saluhutna.

 

♫♪♫    Tondi, sai ajari ahu, jala togutogu ma,

Asa au marpangalaho na badia, na tama.

Sai paburju rohangkon mangoloi hatam tongtong,

Asa molo ro ajalhu, sahat au tu ingananMu.

    

… Musik …

 

15. TANGIANG  PELEAN

 

U:   Tatangianghon ma peleanta! Ale Debata, Amanami na di banua ginjang! Ho do haroroan ni saluhut silehonlehon na denggan dohot nasa ulibasa na mauliutus. Hupasahat hami ma sian na nilehonMi tu hami, peleannami tu Ho. Sai jalo ma i gabe uap na hushus di joloM. Pasupasu ma i jala ramoti asa huparhaseang hami pelean on, patimbulhon harajaonMu di tongatonga ni huriaM dohot di portibi on. Buhai ma rohanami marhitehite TondiM, asa lam hutanda hami godang ni silehonlehonMi tu hami, asa lam girgir hami mandok mauliate tu Ho, marhitehite Jesus Kristus Tuhannami. Amen.

 

H:   (Mangendehon) BE HKBP No. 204: 2 Ndang Tadinghononhu Ho (BL 73) Bes=Do 2/4

       

^♫♪♫   Nasa na nilehonMi, tondi ro di pamatanghu.

Hosa dohot gogongki, ro di saluhut artangku.

Hupasahat i tu Ho, na so unsatonhu do.

 

U:   Ale Amanami na di banua ginjang! Sai pinarbadia ma GoarMu! Sai ro ma harajaonMu! Sai saut ma lomo ni rohaM di banua tonga on songon na di banua ginjang! Lehon ma tu hami sadari on hangoluan siapari! Sesa ma dosanami songon panesanami di dosa ni dongan na mardosa tu hami! Unang hami togihon tu pangunjunan! Palua ma hami sian pangago!

 

H:   (Mangendehon:) BE HKBP No. 841 Ai Ho do Nampuna Harajaon Es=Do 4/4

 

Ai Ho do nampuna harajaon dohot hagogoon, ro di hasangapon. Saleleng ni lelengna. Amen.

 

Pdt:   Dipasupasu ...

 

P/R:  (Mangendehon:) BE HKBP No. 845 Amen (3x) HKBP Es=Do 4/4

       Amen, amen, amen.